सह्याद्रीतील स्वर्गाचे दार: देवकुंड धबधबा

ताम्हिणी घाट उतरल्यावर भिरा गावाजवळ असलेल्या भिरा धरणाजवळ वनात आहे.तिथे जाण्यासाठी भिरा धरणापासून साधारण 2तास वेळ लागतो.धबधबा जिथून खाली पडतो तिथे वर प्लस व्हॅली आहे.पावसाळ्यात तिथे जाणे थोडे कठीण आहे कारण जाताना दोन ओढे लागतात जे पार करणे कठीण आहे.पावसाळा संपल्यावर या ठिकाणी जाण्यास योग्य वेळ आहे.

कसे जावे:

पुणे – ताम्हिणी घाट – विळे – पाटणूस – भिरा कॅंप – सावंतवाडी – देवकुंड असा जाण्याचा मार्ग आहे.

सर्वार्थाने सुंदर गिर्यारोहणाचा अनुभव देणारी जागा म्हणजे ‘प्लस व्हॅली’. देवकुंड किंवा भिरा गावाच्या अलीकडे मुक्काम करता येतो. तसेच भिरा गावातून फक्त देवकुंड धबधबा एका दिवसात पाहून येता येईल. या भागात उन्हाळ्यातही पाणी उपलब्ध असल्यानं उन्हाळ्यात हा ट्रेक करता येतो.

• प्लस व्हॅली: एक कडक अनुभव

पुण्यापासून कोकणात उतरणाऱ्या ताम्हिणी घाटात, ताम्हिणी गावाच्या पुढे डोंगरवाडी जवळ घाटातच पर्यटकांसाठी एक चौथरा बांधलेला आहे. या चौथऱ्यापासूनच आपण दरीत उतरायला सुरुवात करतो. या ठिकाणी दोन दऱ्या एकमेकांना छेदत गेल्या आहेत, अवकाशातून तसेच या घाटातूनही बघितले असता तो आकार ‘+’ या चिन्हासारखा दिसतो. म्हणून या दरीला नाव ‘प्लस व्हॅली’ दिले गेले.

दरीत उतरण्यास सुरुवात केल्यावर ठिसूळ दगडांची मालिका लागते. उजवीकडे उंच कातळकडा ठेवत आपण पुढे मार्गक्रमण करतो. पट्टीच्या गिर्यारोहकांनी या कातळ कड्यावरही रोहणाचा सराव केलेला दिसून येतो. तीस ते पस्तीस मिनिटांमध्ये आपण दरीत पोहोचतो. गर्द झाडांनी हा भाग नटलेला आहे. दगडांच्या कपाऱ्यांमधून वाहत आलेलं पाणी बऱ्याच ठिकाणी आढळून येतं.

उन्हाळ्यातही या ठिकाणी पाण्याची उपलब्धता मुबलक प्रमाणात असते. झाडीमधून उजवीकडे वळून आपण एका लहानशा डोहापाशी येतो. वाहतं आणि स्वच्छ पाणी असल्यानं पाण्याचा तळ स्पष्टपणे दिसतो. पाण्याच्या वाटेनं न जाता डोहाच्या डावीकडून झाडीतून आपण एका कड्यावर पोहोचतो. इथून खाली १०० फुटांचा एक रॅप्लिंगचा टप्पा आहे. योग्य त्या साधनांसह व प्रशिक्षकांच्या मार्गदर्शनाखालीच हा टप्पा उतरणं आवश्यक आहे. पाण्याच्या वेगामुळे दगडालाही कसे आकार प्राप्त होतात ते इथं पाहता येईल.

खाली उतरल्यावर आणखी एक पाण्याचा डोह नजरेस पडतो. या पाण्याच्या सान्निध्यामुळे हा टप्पा सुखावह वाटतो.

इथून पुढे असाच एक रॅप्लिंगचा पॅच आहे. या ठिकाणाहून खाली पाहिलं असता एक कुंड दिसतं. हेच ते प्रसिद्ध देव कुंड.

आता आपण ज्या मार्गाने उतरणार तो मार्ग जलप्रपाताचा आहे. व्यवस्थित साधनं लावून उतरण्यास सुरुवात केल्यावर ४०-५० फुटांपर्यंत पायाला दगड लागतो, त्याच्या मदतीनं आपण हळूहळू खाली उतरतो. जवळजवळ १२५-१५० फुटांचा हा पुढचा टप्पा आपल्याला सरळ देवकुंडामध्ये उतरवतो. रॅपल करत असतानाही पाण्याची संततधार आपल्या शिरावर अभिषेक करीत असते. हवेतून दिसणारं खालील दृश्य इथे येऊनच पाहण्यात मजा आहे.

कुंडाच्या आजूबाजूला पावसाळ्याव्यतिरिक्त मुक्काम करता येतो. दोन्ही बाजूंनी अंगावर येणारे खोलगट कडे व मध्ये साठलेलं पाणी.ज्यांना आवड आहे अशांना कुंडात जलविहारही करता येईल. जर मुक्काम केला तर सकाळी लवकर उठून आवरून पुढे चालण्यास सुरुवात करावी. पाण्याच्या मधूनच प्रवाहमार्गातून चालत गेल्यास सप्तकुंडापाशी आपण येतो.

येथेही मुक्काम करता येईल. आजूबाजूची किर्र झाडी चालताना सुखावून जाते. या सरळ वाटेनं आपण एक-दीड तासात भिरा गावात पोहोचतो. रस्त्याने येताना आपण भिरा धरणाच्या बाजूनेच चालत असतो. उजवीकडे घनगड, कुंडलिका दरी लक्ष वेधून घेतात. भिरा गावात उतरल्याने आपण कोकणातील रायगड जिल्ह्यात प्रवेश करतो.

म्हणजेच पुणे जिल्ह्यातून प्लस व्हॅली मार्गे आपण कोकणात उतरतो. भिरा गावातून देवकुंडपर्यंतचा सोपा ट्रेक उन्हाळ्यापर्यंत करता येतो. रस्ता व्यवस्थित असल्यानं वाटाड्याशिवाय सुद्धा देवकुंडापर्यंत पोहोचता येते.

Thank you…

Source: स्वर्गाहुन सुंदर आपलं कोकण